【山系野遊】「巨木群步道一日健行」

一个予我甘願一生攏佇遐浪費的所在！！食甲四十外歲，才頭一擺來到阿里山，趁著中秋連假傱來一个頂港有名聲，下港上出名的觀光勝地，沓沓仔斟酌來感受一下！

順紲?囡仔來遮親近大自然，一到位就感覺遮的空氣予人鼻著足清爽，原底阮是想欲去行水山巨木步道，猶毋過真無拄好，步道竟然貼著整修的告示雖然失望，好佳哉阿里山是一兩工耍袂完，步道毋但一條爾爾，一條袂通換去行受鎮宮、姐妹潭、巨木群步道，紲落來是一欉閣接過ㄧ欉的巨木，囡仔人佇遐臆樹欉幾歲，大人嘛作伙臆，綴咧心適！今仔日來遮看遐爾大欉的樹仔，佇都市是足罕得看著，會使一斗看予過癮！規工吹著天然的冷氣，真四序～起雺霧的時，袂輸佇咧仙境仝款！而且嘛毋驚枵腹肚，上山進前會當佇嘉義食予人喙瀾嘈嘈滴的火雞肉飯，山裡嘛有予人呵咾甲會觸舌的火車便當，趁著這馬免費入園，鄉親啊！逐家樓頂招樓跤，厝邊招隔壁，阿公牽阿媽來遮行行看看咧！真正是有影袂䆀！上尾當然一定愛記得體驗坐阿里山的小火車喔！！